Hér er rými til að kynna tillögur um ályktanir sem verða lagðar fyrir aðalfund Sósíalistaflokksins.

I. Tillaga um blandaða leið við val á framboðslista til Alþingiskosninga
Flutningsmenn: Kári Jónsson, Guðmundur Jón Erlendsson, Þórdís Bjarnleifsdóttir

Í ljósi fyrri reynslu af uppstillingu teljum við að sú aðferðafræði, þar sem uppstillinganefnd velur alla frambjóðendur á lista, hafi marga vankanta og auki hættu á hagsmunatengslum, takmarkaðri lýðræðislegri þátttöku og ógegnsæi. Tillagan miðar að því að auka gagnsæi, dreifa valdinu og tryggja að framboðslistar endurspegli fjölbreytileika samfélagsins.

Lagt er til að þrír efstu einstaklingarnir á lista í hverju kjördæmi verði valdir í lokuðu prófkjöri, sem allir félagsmenn Sósíalistaflokksins með að minnsta kosti fjögurra mánaða félagsaðild hafa kosningarétt í öllum kjördæmum.

Til að tryggja fjölbreyttari samsetningu listanna og draga úr hættu á hagsmunatengslum og ógagnsæi skal í hverju kjördæmi kosin sjálfstæð valnefnd á félagsfundi, skipuð fimm einstaklingum, sem velur frambjóðendur frá fjórða sæti og niður. Við val nefndarinnar og við störf hennar skal tekið mið af eftirfarandi atriðum:

• að tryggja félagslega fjölbreytni listanna, meðal annars með tilliti til
  stéttarstöðu, kyns, aldurs og búsetu innan kjördæmisins
• að tryggja gagnsæi í ferlinu og skýran rökstuðning fyrir vali frambjóðenda
• að forðast hvers kyns hagsmunatengsl og tryggja að sem flest sjónarmið og
  reynsluheimar fái rödd á listanum.

Þrír efstu frambjóðendur sitja ekki í valnefndum og félagsfundur samþykkir lista
valnefndar í hverju kjördæmi.

Greinargerð um tillögu að blandaðri leið við val á framboðslista til Alþingiskosninga

Markmið okkar með þessari tillögu er að efla lýðræði, tryggja gagnsæi og stuðla að því að framboðslistar Sósíalistaflokks Íslands endurspegli þann fjölbreytileika og þau gildi sem flokkurinn stendur fyrir. Í ljósi reynslu síðustu ára teljum við brýnt að endurskoða þá aðferðafræði sem notast hefur verið við val á frambjóðendum, þar sem uppstillingarnefnd hefur haft algert vald yfir röðun á framboðslista. Sú aðferð hefur að okkar mati ýmsa vankanta sem grafa undan lýðræðislegri þátttöku, auka hættu á klíkuskap og veikja traust almennra félagsmanna til ferlisins.

Ókostir við núverandi fyrirkomulag:

• Skortur á lýðræðislegri þátttöku: Félagar hafa lítið sem ekkert að segja um röðun frambjóðenda á lista. Valdið er í höndum fárra og þátttöku almennings í ferlinu er haldið í lágmarki.
• Hætta á hagsmunatengslum: Nefndin getur ómeðvitað (eða meðvitað) látið persónuleg tengsl, vináttu eða eigin hugmyndir um „samvinnuþýða“ einstaklinga ráða för frekar en sjónarmið um pólitíska styrkleika, fjölbreytileika eða lýðræðislegt umboð.
• Skortur á gagnsæi: Ferlið er oft óskýrt, og ekki liggur alltaf fyrir hver rökstuðningurinn er fyrir vali frambjóðenda eða röðun þeirra á lista.
• Skert traust: Þegar val á frambjóðendum byggir á lokuðu og ógegnsæju ferli minnkar traust félagsmanna á lýðræðislegum vinnubrögðum flokksins.

Kostir tillögunnar um blandaða aðferð við val á framboðslista til Alþingiskosninga:

• Lýðræðisleg þátttaka félaga: Með því að veita öllum skráðum félagsmönnum kosningarétt í vali efstu frambjóðenda er valdið fært til grasrótarinnar. Félagar fá raunverulegt vald til að velja þau sem leiða baráttuna í öllum kjördæmum.
• Dreifing valds: Tillagan felur í sér tvískipt ferli þar sem félagsmenn velja efstu sæti og fimm manna valnefnd, kosin á félagsfundi, hefur það hlutverk að tryggja fjölbreytileika í neðri sætum. Þetta minnkar miðstýringu og veitir bæði lýðræðislega skírskotun og aðhald í ferlinu.
• Aukið gegnsæi og ábyrgð: Með skýrum ramma um störf valnefnda – þar sem krafa er um rökstuðning, gagnsæi og fjölbreytileika – skapast traustara og réttlátara ferli. Aðkoma félagsfundar tryggir aukið aðhald og eykur ábyrgð þeirra sem vinna að listagerð.
• Tryggir breiðara fulltrúalýðræði: Með skýrum leiðbeiningum til valnefndar um að tryggja félagslega fjölbreytni aukast líkur á að listinn endurspegli samfélagið – stéttaskiptingu, kyn, aldur og búsetu og þannig verður boðið upp á trúverðugar raddir úr öllum áttum samfélagsins.

Við teljum að þessi tillaga sé skref í átt að opnara, réttlátara og lýðræðislegra flokksstarfi. Hún byggir á grunngildum sósíalisma: samstöðu, dreifingu valds og virku lýðræði. Við hvetjum því félaga til að samþykkja þessa tillögu og taka virkan þátt í að byggja sterkari og lýðræðislegri hreyfingu frá grunni.

 

 

II. Tillaga um ráðstöfun ríkisstyrks Alþingis til Sósíalistaflokks Íslands og Alþýðufélagsins
Flutningsmenn: Kári Jónsson, Guðmundur Jón Erlendsson, Þórdís Bjarnleifsdóttir

Við leggjum til að ríkisstyrkur Alþingis skiptist jafnt á milli Sósíalistaflokk Íslands og Alþýðufélagsins sem á og rekur Samstöðina.

1. Við teljum brýnt að tryggja rekstur Sósíalistaflokks Íslands og Samstöðvarinnar.
2. Við leggjum til að 50% af ríkisstyrknum fari til Sósíalistaflokks Íslands því við
   teljum brýnt að flokkurinn eigi handbært fé til reksturs flokksins og kosningabaráttu.

Teljum brýnt að Samstöðin fái 50% af styrknum til að geta haldið áfram því öfluga starfi sem það hefur sinnt hingað til í sjónvarpi og útvarpi með öflugri samfélagslegri umræðu í hnignandi fjölmiðlaumhverfi.

Með þessari breytingu verður sú breyting á að Sósíalistaflokkur Íslands tekur við leigusamningi og rekstri á félagsheimili Sósíalistaflokks Íslands, Vorstjörnunni Bolholti 6.

 

Greinargerð með tillögu um ráðstöfun ríkisstyrks Alþingis til Sósíalistaflokks Íslands og Alþýðufélagsins

Rökstuðningur

1. Tryggja þarf rekstur flokksins sjálfs
   Til þessa hefur flokkurinn ekki haft sjálfstæðan hluta af ríkisstyrknum til eigin reksturs, þrátt fyrir að vera stjórnmálaflokkur með vaxandi skyldur og verkefni. Ef við ætlum að byggja upp sterkan, lýðræðislegan og sjálfbæran flokk sem getur staðið undir reglulegri kosningabaráttu, skipulögðu starfi á landsvísu og öflugri stefnumótun, þá verður flokkurinn að hafa eigin fjárhag og aðgengi að fjármagni. Handbært fé er nauðsynlegt til að halda úti skipulagi, innviðum, tengslum við grasrótina og ekki síst undirbúningi fyrir komandi alþingiskosningar.
2. Samstöðin gegnir lykilhlutverki í miðlun og umræðu
   Við viljum ekki veikja Samstöðina – þvert á móti. Samstöðin hefur reynst einn mikilvægasti samfélagslegi vettvangur flokksins, þar sem sjónarmið sem jaðarsett eru í ríkjandi fjölmiðlum fá pláss og málefni alþýðunnar njóta umfjöllunar. Í hnignandi fjölmiðlaumhverfi, þar sem frjáls og sjálfstæður umræðuvettvangur er undir þrýstingi, er nauðsynlegt að verja fjármögnun Samstöðvarinnar. Þess vegna leggjum við til að hún haldi áfram að fá 50% af styrknum, óskert.
3. Skýrari verkaskipting og sjálfbær innviðaþróun
   Með þessari breytingu er rekstur Sósíalistaflokksins tryggður til að hrinda í framkvæmd verkefnum og kosningabaráttu. Framlag Sósíalistaflokksins til Samstöðvarinnar (50%) af ríkisstyrk alþingis hefur mikil og jákvæð áhrif fyrir áframhaldandi uppbygginu Samstöðvarinnar og rekstur. Flokkurinn tekur við rekstri félagsheimilisins í Bolholti, sem endurspeglar aukna ábyrgð og sjálfstæði flokksins sem stjórnmálaafls. Þetta er skref í átt að sjálfstæðum innviðum og fjárhagslegri sjálfbærni beggja eininga, þar sem hvor fyrir sig getur sinnt sínu hlutverki á sterkari grunni.

Niðurstaða

Við leggjum þessa breytingu til af ábyrgð og langtímahugsun. Hún styrkir flokksstarfið, ver Samstöðina og tryggir skýrari aðgreiningu milli pólitísks afls og fjölmiðlahlutverks. Með því að skipta ríkisstyrknum jafnt á milli Sósíalistaflokks Íslands og Alþýðufélagsins byggjum við báðar stoðir hreyfingarinnar upp á sanngjarnan, gagnsæjan og sjálfbæran hátt.

Við hvetjum félagsmenn til að styðja þessa tillögu í nafni lýðræðis, ábyrgðar og sterkara flokksstarfs.

 

III. Tillaga um að boðið verði fram til sveitarstjórnarkosninga

Kosningastjórn leggur til tvær tillögu um að bjóða fram í sveitarstjórnarkosningum. Annars vegar tillögu um að ákveða að bjóða fram og hinsvegar tillögu um verklag vegna undirbúnings og skipulags. sveitarstjórnarkosninga.

Kosningastjórn leggur til að aðalfundur samþykki að bjóða fram til sveitarstjórnarkosninga árið 2026. Kosningastjórn verði falin nánari útfærsla við viðeigandi sveitarfélög. Stefnt verður að því að bjóða fram í öllum sveitarfélögum.

Þetta er fyrsta tillaga kosningastjórnar

 

IV. Tillaga um val á lista fyrir sveitarstjórnarkosningar

Kosningastjórn leggur til eftirfarandi tillögu um val á lista í sveitarstjórnum, til að undirstrika að félagar í sínu nærumhverfi komi að þessum málum, þ.e.a.s röðun á lista og undirbúning og þetta er sett fram með það að að markmiði að virkja félagsstarf og félaga í sínum sveitarstjórnarkosningum. Þannig að það sé skýrt í verklagi okkar hvernig við vinnum fyrir næstu sveitarstjórnarkosningar.

Tillaga 2: Kosningastjórn verði falið að leita til félaga í öllum sveitarfélögum og vinna sameiginlega að því að undirbúa sveitarstjórnarkosningar.
Kosningastjórn hefur samband við öll sveitarfélög þar sem Sósíalistaflokkur Íslands á félaga og leitar að þeim sem eru tilbúin til þess að gefa kost á sér í framboð. Félagar fái verkefni og vinna þannig að uppbyggingu starfs og undirbúningi til sveitarstjórnarkosninga í samvinnu við aðra félaga. Stuðst verði við uppstillingu á lista til sveitarstjórnarkosninga þar sem ábyrgðarmanneskja í hverju sveitarfélagi fyrir sig heldur utan um röðun á lista í samvinnu við heimamenn sem vilja taka virkan þátt í starfinu og kosningastjórn og úr því mynduð uppstillingarnefnd. Kosningastjórn skipar a.m.k. einn fyrir hvert sveitarfélag til að veita aðstoð við uppstillingu framboðslista og önnur mál. Listar verði lagðir fram til staðfestingar félagsfundar sem verði haldinn í viðkomandi sveitarfélagi með fjarfundarmöguleika.

 

V. Tillaga um alþingiskosningar

Tillaga kosningastjórnar um val á lista fyrir þingkosningar

Samþykkt verði að búa til uppstillingarnefnd fyrir Alþingiskosningar þar sem sameiginlegur fundur allra stjórna flokksins velur ábyrgðaraðila uppstillingarnefndar, eftir að hafa óskað eftir tilnefningum frá félögum. Ábyrgðaraðilinn verður valinn að minnsta kosti sex mánuðum fyrir kosningar. Hann heldur utan um val á tíu félögum í nefndina, færir rök fyrir sínu máli og leggur fyrir til samþykktar félagsfundar en getur einnig bætt félögum við í nefndina til að sinna verkefnum eftir þörfum. Nefndin leitar eftir stuðningi og aðstoð frá kjördæmum við uppstillingu en hefur lokaorðið í ákvörðunum. Uppstillingarnefnd velur frambjóðendur á lista í öllum kjördæmum og leggur þá fram til samþykktar á félagsfundi. Listarnir teljast þá formlega samþykktir eða felldir. Þriggja manna hópur úr hverju kjördæmi kemur til aðstoðar í sínu kjördæmi og verði hluti að nefndinni þegar val á lista í því kjördæmi eru í undirbúningi. Leitast skal við að tíu manna nefndin verði skipuð einstaklingum úr öllum kjördæmum sem boðið er fram í. Rökstyðja skal val á lista.

Rök: Þetta er gert af praktískum aðstæðum, þetta er mikil vinna þar sem fólk þarf að gefa sig fram í starfið framundan.