Sósíalistaflokkur Íslands lýsir yfir eindregnum stuðningi við stórfundinn Þjóð gegn þjóðarmorði, sem haldinn verður laugardaginn 6. september í Reykjavík, á Ísafirði, Akureyri, Stykkishólmi og á Egilsstöðum.

Við stöndum saman með verkalýðshreyfingunni, mannúðarsamtökum og almenningi í þeirri skýru kröfu að íslensk stjórnvöld bregðist þegar í stað við yfirstandandi þjóðarmorði Ísraels í Palestínu.

Í nær tvö ár hefur heimsbyggðin horft upp á ólýsanlegar þjáningar palestínsku þjóðarinnar: tugþúsundir almennra borgara hafa verið drepnir, þar á meðal tugþúsundir barna, og milljónir standa frammi fyrir hungurdauða. Alþjóðadómstóllinn hefur staðfest að framganga Ísraels jafngildi þjóðarmorði og úrskurðað hernám þess á palestínsku landi ólöglegt. Þrátt fyrir þetta hafa vestræn ríki, þar á meðal Ísland, látið nægja innihaldslausar yfirlýsingar í stað þess að beita raunverulegum þrýstingi.

Við segjum: Nú er nóg komið.

Sósíalistaflokkur Íslands krefur ríkisstjórnina um að:

• Styðja málsókn Suður-Afríku gegn Ísrael og viðurkenna að þjóðarmorð Ísraels gegn Palestínu sé staðreynd.

• Setja viðskiptabann á Ísrael og banna viðskipti við fyrirtæki sem hagnast á hernámi og aðskilnaðarstefnu.

• Beita sér fyrir alþjóðlegum viðskiptaþvingunum gegn Ísrael og efla í staðinn viðskipti og samskipti við palestínsku þjóðina.

Þessar aðgerðir eru í fullu samræmi við alþjóðalög. Aðgerðarleysið til þessa gagnvart þjóðarmorði og hernámi Ísraels á palestínsku þjóðinni er áfellisdómur yfir íslenskum stjórnvöldum.

Alþingi og ríkisstjórn Íslands starfa í umboði þjóðarinnar. Þeim ber skylda til að endurspegla vilja hennar, verja alþjóðalög og beita sér af fullum þunga fyrir því að Ísrael láti þegar í stað af þjóðarmorði, virði rétt Palestínumanna til lífs, lands og frelsis.

Við hvetjum allt okkar fólk til að fjölmenna á mótmælafundina 6. september og sýna þar ótvíræða samstöðu með palestínsku þjóðinni.

Tími yfirlýsinga og undanbragða er liðinn, tími aðgerða er runninn upp.

Sósíalistaflokkur Íslands

P.S
Viðburðir mótmælanna á Fésbókinni:

Reykjavík: Þjóð gegn þjóðarmorði – Reykjavík | Facebook
Egilsstöðum: Þjóð gegn þjóðarmorði – Egilsstaðir | Facebook
Ísafirði: Þjóð gegn þjóðarmorði – Ísafjörður | Facebook
Akureyri: Þjóð gegn þjóðarmorði – Akureyri | Facebook
Stykkishólmi: Þjóð gegn þjóðarmorði – Stykkishólmur | Facebook